Solidariedade e apoio da Coordenadora a Xulio Fernández, portavoz de “Matar por matar non”, agredido por cazadores

pontevedraantitaurina — Sat, 17 Oct 2009 01:50:24 +0000

Desde a Coordenadora Antitouradas de Pontevedra queremos solidarizarnos e amosar o noso completo apoio a Xulio Fernández, portavoz da plataforma ecoloxista amiga “Matar por matar non“, que foi en días atrás obxecto dunha malleira por parte duns cazadores desaprensivos mentres se atopaba nunha das súas propiedades. Denunciamos a actitude cobarde de quen non sabe se non expresarse coas persoas do mesmo xeito que o fai cos animais, mediante o maltrato e a violencia irracional.

Xulio é amigo e apoiante , conxuntamente con “Matar por matar non” dos antitaurinos de Pontevedra desde a nosa fundación. Desde esta humilde xanela na rede, recebe o noso mais afectuoso apoio.

Mais info. sobre a agresión en vieiros.

Nova galeria de imaxes sobre a manifestación 2009

pontevedraantitaurina — Wed, 05 Aug 2009 01:26:00 +0000

Apresentamos unha nova galería de imaxes que recolle a exitosa manifestación antitouradas deste ano 2009.

Manifestación Histórica contra as touradas en Pontevedra

pontevedraantitaurina — Sun, 02 Aug 2009 18:59:06 +0000

FAI CLICK NA IMAXE PARA VER O VIDEO

Desde a Coordenadora Antitouradas queremos agradecer aos diferentes colectivos participantes, así como ao medio milleiro de persoas que secundaron a nosa mobilización, o seu apoio e compromiso activos coa causa da erradicación das touradas, superando con creces a cifra de asistentes no ano 2008 e conseguindo a maior demostración de oposición ás touradas na historia da cidade. Algúns xornais, como “La Voz de Galicia”, nunha mostra de “profesionalidade” e “veracidade informativa”, reduciron a 40 os participantes, mentres que Xornal de Galicia sí que daba conta da cifra real de asistentes. De todas formas, a todos e todas vós, que facedes posíbel o soño dunha Pontevedra libre do maltrato e sadismo cara os touros: grazas. (a crónica continúa despois da galería de imaxes que podedes ver a continuación)

Minutos antes das 19h da tarde, dúcias de persoas ían chegando á praza da Peregrina para se concentraren e saíren contra as 19:20h en manifestación polas rúas da cidade. Os diferentes colectivos despregaban as súas faixas, a meirande parte delas con motivos alusivos á degradante “festa” dos touros, mentres un gaiteiro amenizaba a mobilización xa desde o comezo. Durante o traxecto puidéronse escoitar diferentes palabras de orde, tal como: “A tortura non é festa nen cultura”, “Ilegalizar o maltrato animal”, “non son artistas, son asasinos” ,”touradas fóra da Galiza” ou “festas populares, sen atrocidades”. A manifestación creou expectación na rúa, e numerosas persoas ían uníndose conforme avanzaba polo centro de Pontevedra. Ao finalizar deuse lectura ao manifesto (que adxuntamos liñas abaixo) e agradeceuse a participación dos colectivos e manifestantes. Na mesma tarde, tres matarifes torturaban os primeiros seis touros dos 24 que serán asasinados nestas dúas fins de semana.

Moitos dos participantes adquiriron antes do comezo os panos verdes editados pola Coordinadora Antitouradas, para subvertirmos así o significado que os pro-touradas conceden ás festas de agosto na cidade, e en particular o fenómeno das “peñas” xuvenís. A marcha percorreu o centro de Pontevedra entre consignas pola abolición da tauromaquia e en defensa dunhas festas populares e sen touradas, para rematar na mesma praza uns tres cuartos de hora despois, onde tres activistas da Coordinadora agradeceron os numerosos apoios recibidos e leron o manifesto, con reivindicacións concretas dirixidas ás institucións.

No entanto, as administracións públicas continúan a colaborar na pervivencia desta barbarie. Á mesma hora que centos de manifestantes ocupaban as rúas, destacados cargos públicos (incluidos o presidente da Xunta Núñez Feijoo, o da Deputación, Rafael Louzán e o ministro de Fomento, José Blanco, así como o Delegado do Goberno, Antón Louro) decidían ratificar publicamente o seu apoio á tortura de animais como divertimento coa súa presenza na praza de touros.

A manifestación demostra que o movimento antitouradas medra ano tras ano, ao consolidarse a oposición social a unha festa baseada no sofrimento dos animais, a pesar do maioritario silenciamento mediático, que chega ata o extremo de non aproveitar o traballo realizado polos seus reporteiros gráficos. Trátase dunha carreira de fondo que só ten un final posíbel: a erradicación desta lacra da nosa cidade. Estamos seguros de que o conseguiremos.

A continuación colamos o manifesto:

MANIFESTO DA COORDENADORA ANTITOURADAS DE PONTEVEDRA

Hoxe en día, mais do que nunca, a sensibilidade perante o maltrato animal debería formar parte do noso ideario colectivo. As touradas representan o paradigma máis cínico deste sofrimento, elevando a nivel de espectáculo a crueldade especista.

Na nosa cidade, nestas dúas fins de semana, serán masacrados vintecatro touros co disfrute dalgúns, a pasividade doutros e o rexeitamento de gran parte da sociedade. As touradas en Galiza contan cunha presenza decadente e unha curta historia, sendo apoiadas por algúns dos sectores mais reaccionarios , e promovidas por empresarios sen escrúpulos, como é o caso dos irmáns Lozano na nosa cidade.

Desde a Coordenadora Antitouradas de Pontevedra recollemos o legado doutros focos de loita antitaurina en Galiza que xurdiran nos últimos tempos, como foi a Plataforma Antitaurina Galega e mais recentemente a iniciativa “Galicia Mellor sen Touradas”, e denunciamos:

- O trato cruel e inhumano que os touros receben no transcurso desta mal chamada festa, na cal o touro é desgarrado, mutilado e torturado até morrer, así como o maltrato animal en xeral.

- A obscena utilización de fondos públicos para o financiamento das touradas (42 euros por habitante, segundo “Libera”), a pesar de que as enquisas (Gallup 07) amosan que o 86% da poboación galega se declara indiferente perante este atavismo.

- As touradas como coartada para a construcción da identidade española en Galiza. Nengunha identidade se pode construír en base ao sofrimento dun animal.

- A forte componente machista das touradas, ao exaltar a figura masculina nunha loita contra un animal mitificado na que o home sae sempre vitorioso.

- O cinismo das Leis españolas e galegas, onde as disposicións legais exclúen taxativamente as touradas do ámbito da súa acción, cando as propias leis están xustificadas por criterios éticos ou morais.

Por tanto, demandamos:

1. O cese inmediato de axudas encobertas ás touradas por parte de todas as Institucións, nomeadamente a Deputación de Pontevedra, principal soporte público na nosa cidade.

2. Que a Xunta de Galiza aprobe unha “Lei de Protección Animal” que proíba as touradas e espectáculos onde se torture ou mate animais.

3. A supresión das touradas como reclamo turístico por parte das Institucións Públicas, así como dos programas de festas editados polo noso Concello, ademais da declaración de Pontevedra como “Cidade Antitouradas e amiga dos Animais”.

4. O uso de espazos públicos para a promoción das touradas.

5. A reconversión da Praza de Touros nun Coliseu para espectáculos culturais e concertos, así como a eliminación de toda a simboloxía taurina presente na cidade.

Desde a nosa Coordenadora solicitamos ás peñas responsabilidade e reflexión perante o uso do maltrato e a barbarie como motivo de celebración.

Por isto, chamamos á cidadanía a amosar publicamente o seu rexeitamento ás touradas e convidamos a participar nas actividades programadas pola Coordenadora, entre as cais queremos convidarvos expresamente ao Encierro antitaurino que terá lugar o mércores 5 ás 8 horas da tarde entre as prazas de San Xosé e a Peregrina. Non esquezades traer as pañoletas antitouradas!

Finalmente , dámosvos as grazas pola vosa participación na mobilización de hoxe. Pasamos a ler a listaxe de apoiantes da convocatoria:

A plataforma “Galicia Mellor sen Touradas“, que aglutina 20 colectivos, a asociación animalista “Matar por Matar Non” , a protectora “Os Palleiros“, a asociación animalista “Libera“, o PACMA (Partido Antitaurino contra o maltrato animal), Verdegaia, a ONG Amarante, Amigos da Terra, Isca! , Assembleia da Mocidade Independentista, Acçom Antifascista, Galiza Nova , a A.C Revira , a LNB (Liga Nacional de Billarda) a A.C. Almuinha de Marín, así como o colectivo de Sarria e Lugo que organizou a manifestación antitouradas en Outarela hai un mes, os voluntarios do Refuxio de Animais Abandonados de Ponteareas – Colectivoanimal (Asociación Protectora Sen Fronteiras), Asociación Protectora Moura, e tamén nos envía o seu apoio o “Colectivo Andaluz contra el maltrato animal”.

Pola fin das touradas da nosa cidade!

Empresarios taurinos ameazan e tentan agredir á membros da Coordinadora Antitouradas de Pontevedra

pontevedraantitaurina — Thu, 30 Jul 2009 17:38:26 +0000

FAI CLICK NA SEGUINTE IMAXE PARA VER O VIDEO

“A tauromaquia é o malfadado e venal arte de torturar e matar animais en público. Traumatiza aos nenos e aos adultos sensibles. Agrava o estado dos neurópatas atraídos por eses espectáculos. Desnaturaliza a relación entre o home e o animal. Constitúe un desafío á moral, a educación, a ciencia, a cultura…”.

Unesco, 1980

Un dos numerosos actos realizados pola Coordinadora Antitouradas de Pontevedra tivo un final inesperado na mañá de hoxe, debido á agresividade dos que enchen os seus petos co sufrimento animal. A plataforma contra estes festexos precintou simbolicamente unha das portas de entrada da praza, co lema “precintado por tortura”, para anticipar unha realidade que agardamos que chegue máis cedo que tarde, e ordenada polas administracións públicas que agora amparan este cruel espectáculo.

No entanto, os empresarios taurinos agardaron a que marcharan os reporteiros gráficos para ameazar e tentar agredir aos integrantes da Coordinadora. Non se limitaron a retirar o precinto da porta entre insultos, senón que un dos presentes chegou a solicitar a outro, en claro ton ameazante, que “le acercase una escopeta”, ademais de proferir insultos orixinais como “cagones”, “portugueses” ou esixir “que habléis en español”.

A continuación, achegáronse violentamente contra os manifestantes e tentaron agredir ao que portaba unha videocámara, que estaba rexistrando o acto. Un dos empregados mesmo portaba un pao co que tentou golpear a un dos manifestantes.

Os empresarios das touradas non querían que ficase constancia documental da súa actitude prepotente e ofensiva, polo que advertiron ao cámara que lle ían “hinchar la cara a hostias”. Anteriormente, os empresarios xa restrinxiran o traballo dos medios de comunicación ao coñecerse as lesións que sofreu un touro cando era transportado cara ao seu lugar de martirio. Afortunadamente, a maior cordura dos contrarios á tortura animal impediu que o incidente pasase a maiores.

A responsabilidade dos irmáns Lozano

Na trifulca chegou a intervir Eduardo Lozano, empresario de Toledo que é o donos da praza a través da sociedade que comparte cos seus irmáns, pero non para calmar os ánimos, senon para tentar expulsar da rúa aos integrantes da Coordinadora.

Os irmáns Lozano adquiriron a praza de touros a finais dos 70, cando só se celebraba unha corrida, para recuperar unha barbarie en declive. Así, lograron aumentar os seus obscenos beneficios, en grande medida grazas ás axudas públicas, a costa da morte de máis touros segundo pasaba o tempo: 12 animais nos 80, 18 nos 90 e os 24 bóvidos asasinados cada verán desde hai algúns anos; unha triste bagaxe de máis de medio milleiro de touros mortos baixo a tortura incesante das banderillas e a espada.

Estes empresarios da tortura son mesmo repudiados no submundo da tauromaquia por numerosas irregularidades legais, débedas acumuladas e uns métodos e actitudes caracterizados pola “prepotencia e abuso de poder” (segundo os propios “matadores”), o que no seu momento levou á xustiza a anularlles a concesión da praza madrileña de Las Ventas.

Non resulta sorprendente en absoluto que quen considera ético lucrarse da tortura dos animais careza tamén de educación e respeto polas persoas. Carentes de empatía cun animal torturado ata a morte, carecen dela para comprender aos seus semellantes que lles reprochan tal atrocidade. En todo caso, non pensamos ceder á coacción e renunciar ás nosas liberdades de expresión, reunión e manifestación, nin temos que tolerar insultos e ameazas como as escoitadas na mañá de hoxe, motivo polo cal nos decidimos a facelos públicas. A pesar do violento intento de censura, a Coordinadora ten imaxes gravadas de todo o incidente –que son accesíbeis no noso web- polo que a súa veracidade está fora de toda dúbida.

Continúan os preparativos da mobilización

A iniciativa en prol da erradicación das touradas prosegue o seu traballo en prol da difusión social da convocatoria de mobilización, o próximo sábado 1 de agosto ás 19 horas na Praza da Peregrina. Ducias de faixas en pontos estrátexicos da cidade, centos de cartaces, e mesas informativas diarias convocan á cidadanía a expresar unha rotunda oposición a esta barbarie que quer disfarzar-se de cultura ou tradición.

Roteiro Antitouradas – A coordenadora reivindica a fin das touradas perante as institucións

pontevedraantitaurina — Wed, 29 Jul 2009 18:33:01 +0000

A Coordinadora contra as Touradas de Pontevedra organizou un roteiro reivindicativo que percorreu as principais institucións públicas que teñen responsabilidades, dun ou doutro xeito, na pervivencia deste espectáculo de tortura animal na nosa cidade. A actividade serve de preludio á manifestación convocada este sábado ás 7 da tarde (desde a Peregrina), na que se agarda a presenza de centos de persoas, fartas desta “tradición” que nada ten a ver nin coa arte nin coa cultura.
A xornada comezou na delegación da Xunta de Galiza en Campolongo, onde se entregou un escrito no que se esixía a promulgación dunha lei de protección animal que inclúa especificamente as touradas entre as práticas prohibidas.

Acompañados en todo momento dunha faixa co lema “Touradas fora de Pontevedra”, a ducia de persoas participantes na iniciativa dirixíronse cara o Concello, onde se reclamou unha declaración de “Cidade Antitouradas” e amiga dos animais, a supresión do evento do programa de festas e a retirada do espazo público da propaganda que incite á matanza de touros.

Faltaban aínda no percorrido a Subdelegación do Goberno e a Deputación de Pontevedra. A ambas institucións reclamámoslles que deixen de subvencionar as touradas ou asociacións que promovan o maltrato animal con fondos públicos.

Por último, achegámonos ata a praza de touros. A Coordinadora reclama a súa reconversión nun coliseu para actos culturais, no momento en que nos libremos desta vergoña, cando as touradas pasen a formar parte dun pasado negro xa superado.

Nestes días, a Coordenadora continúa a pegada masiva de cartaces anunciando a manifestación e segue a instalar en horario de mañá e de tarde a súa mesa informativa na Praza da Peregrina, tendo de momento unha moi boa acollida entre a cidadanía a recollida de sinaturas e visualizando a actividade do noso colectivo. E recordade, o día 1 às 19h na Peregrina, Manifestación Antitouradas en Pontevedra!!

Novas actividades e numerosas adesións á manifestación do día 1 de Agosto

pontevedraantitaurina — Tue, 21 Jul 2009 05:19:37 +0000

Son xa numerosos colectivos e asociacións os que teñen expresado o seu apoio á convocatoria do día 1 de Agosto, como é o caso da plataforma “Galicia Mellor sen Touradas“, que aglutina 20 colectivos, a asociación animalista “Matar por Matar Non” , a protectora “Os Palleiros“, a asociación animalista “Libera“, o PACMA (Partido Antitaurino contra o maltrato animal), Verdegaia, a ONG Amarante, Amigos da Terra, Isca! , Assembleia da Mocidade Independentista, Acçom Antifascista, Galiza Nova , a A.C Revira , LNB (Liga Nacional de Billarda) a A.C. Almuinha de Marín, así como o colectivo de Sarria e Lugo que organizou a manifestación antitouradas en Outarela hai un mes, os voluntarios do Refuxio de Animais Abandonados de Ponteareas – Colectivoanimal (Asociación Protectora Sen Fronteiras), Asociación Protectora Moura, e tamén nos envía o seu apoio o “Colectivo Andaluz contra el maltrato animal”.

Nos próximos días agardamos novas adesións de colectivos ambientalistas e sociais (en permanente actualización)

Para aderir á manifestación, podedes enviar un correo a: adesions@pontevedraantitouradas.org

A Coordenadora Antitouradas de Pontevedra é unha plataforma aberta, plural e integradora a prol da erradicación das touradas na cidade de Ponte Vedra. Logo de 2 anos de traballo contra as touradas baixo o lema “Pontevedra Antitaurina”, durante os cales tiveron lugar diferentes campañas de sensibilización e mobilizacións, a Coordenadora pretende dar un paso adiante e facer visíbel a oposición da maioría dos pontevedreses e pontevedresas ao maltrato animal, con vocación pedagóxica e unitaria.

Así pois, apresentaremos en rolda de imprensa, neste mércores 22 de Xullo, o noso programa de actividades.

CALENDARIO DE ACTOS
- Mércores 22 de Xullo de 2009: Rolda de prensa informativa (ás 12h no salón de actos do edificio dos sindicatos.)

Inicio da campaña de recollida de sinaturas e instalación de mesa na Peregrina. Asemblea da Coordenadora

- Venres 31 de Xullo ás 20h: Charla-Coloquio Antitouradas na praza da Pedreira. Con Rubén Pérez Sueiras (Galicia Mellor sen Touradas) e outra persoa por confirmar.

- Sábado 1 de Agosto de 2009 ás 19h con inicio e fin na Peregrina (Ponte Vedra). MANIFESTACIÓN CONTRA AS TOURADAS POLA RÚAS DA CIDADE

- Mércores 5 de Agosto ás 20h entre a praza de San Xosé e Peregrina: ENCIERRO-ANTITAURINO (performance colectiva)

Para mais información: info@pontevedraantitouradas.org

Agradecemos tamén os apoios expresos que nos fixeron chegar: o blogue A Ponte Vella , o grupo musical INVIVO através de Mario César Vila, Ernesto Vázques Souza.

Manifesta-te contra as touradas en Ponte Vedra no 1 de Agosto

pontevedraantitaurina — Sat, 18 Jul 2009 06:38:47 +0000

A Coordenadora Antitouradas de Pontevedra convoca unha manifestación anti-touradas no Sábado 1 de Agosto ás 19h con saída e fin na praza da Peregrina da cidade, e percorrido polas rúas da cidade.

6 pontos básicos

1) Cese inmediato de axudas encubertas ás touradas por parte de todas as institucións, nomeadamente da Deputación de Pontevedra, principal financiador público.

2) Instar á Xunta a aprobar unha Lei de Protección Animal que proíba as touradas e espectáculos onde se torture ou mate animais.

3) Declaración por parte do Concello de Pontevedra como “Cidade Antitouradas” e amiga dos animais.

4) Supresión das touradas como reclamo turístico por parte das Institucións públicas, así como dos programas de festas.

5) Erradicación do uso de espazos públicos para a promoción das touradas.

6) Reconversión da Praza de Touros nun Coliseu para espectáculos culturais e concertos.

Preme en “ler máis” para acceder ás nosas razóns e á convocatoria en norma AGAL.

Algunhas das nosas razóns

A Coordenadora Antitouradas de Pontevedra é unha plataforma aberta que persegue a erradicación das touradas na nosa cidade

- Denunciamos o trato cruel e inhumano que os touros receben no transcurso desta mal chamada festa, na cal o touro é desgarrado, mutilado e torturado até morrer, así como o maltrato animal en xeral.

- Advertimos das touradas como coartada para a construción da identidade española na Galiza. Constitúe un ritual en torno ao cal conflúen os sectores mais reaccionarios da sociedade.

- Consideramos obscena a utilización de fondos públicos para a financiación das touradas (42 euros em impostos por habitante, segundo Libera) , a pesarde que as enquisas (Gallup 07) amosan que un 86% da poboación galega se declara indiferente perante este atavismo.

- Finalmente, as touradas teñen unha forte compoñente machista, ao exaltar a figura masculina nunha loita contra un animal “mitificado” da que sempre sae vitorioso.

EM NORMAL AGAL

A Coordenadora Antitouradas de Ponte Vedra convoca umha manifestaçom anti-touradas no Sábado 1 de Agosto às 19h na praça da Peregrina da cidade.

6 pontos vindicativos básicos

1) Cese inmediato de ajudas encubertas às touradas por parte de todas as instituiçons, nomeadamente da Deputaçom de Ponte Vedra, principal financiador público.

2) Instar à Junta a aprobar unha Lei de Protecçom Animal que proíba as touradas e espectáculos onde se torture ou mate animais.

3) Declaraçom por parte do Concelho de Ponte Vedra como “Cidade Antitouradas” e amiga dos animais.

4) Supressom das touradas como reclamo turístico por parte das Instituiçons Públicas, assi como dos programas de festas.

5) Erradicaçom do uso de espaços públicos para a promoçom das touradas.

6) Reconversom da Praça de Touros num Coliseu para espectáculos culturais e concertos.

Algumhas das nossas raçons

- Denunciamos o trato cruel e inhumano que os touros recebem no transcurso de esta mal chamada festa, na qual o touro é desgarrado, mutilado e torturado até morrer, assi como o maltrato animal em geral.

- Advertimos das touradas como coartada para a construçom da identidade espanhola na Galiza. Constitui um ritual em torno do qual confluem os sectores mas reaccionários da sociedade.

- Consideramos obscena a utilizaçom de fundos públicos para o financiamento das touradas (42 euros em impostos por habitante, segundo Libera) , a pesar de que os inquéritos (Gallup 07) mostram que um 86% da população galega se declara indiferente perante este atavismo.

- Finalmente, as touradas têm uma forte componente machista, ao exaltar a figura masculina numa luta contra um animal “mitificado” da que sempre sai vitorioso.

Notável éxito na mobilizaçom do 9-A e ameaças de sançons económicas

pontevedraantitaurina — Wed, 13 Aug 2008 10:55:48 +0000

Podes ver o vídeo em maio tamanho e qualidade em GzVídeos.

A mobilizaçom de Ponte Vedra Antitaurina congregou centos de pessoas no sábado, mesmo minutos antes da hora agendada, às 7 da tarde, momento no que começavam a torturar um dos 12 animais assassinados na fim da semana na Praça de Touros.

A Peregrina, ateigada por centos de pessoas que viviam as festas da cidade, acolheu umha mobilizaçom histórica, que no entanto repressentou apenas um primeiro passo no caminho de agitamento social, que rematará mais cedo que tarde por expulsar a tortura animal da nossa cidade. As consignas de orde, que se sucederom em todo momento, avogavam pola aboliçom das touradas da cidade e de toda a Galiza e assinalavam responsabilidades assassinas nos matarifes conhecidos como toureiros. A concentraçom partiu da Peregrina e realizou um breve percorrido pola cidade, para rematar na mesma praça, onde se agradeceu a presença de todas as pessoas asistentes e se leu o manifesto da plataforma.

Salientava a presença maioritária da juventude, que na sua imensa maioría rexeita já esta negra “tradiçom” da tristemente chamada “Festa Nacional” polo franquismo. De facto, muitas das pessoas participantes no fenómeno lúdico das penhas –que dum jeito interesseiro se vincula sempre às touradas, quando nom é mais do que umha manifestaçom festiva com predomínio da bebedeira, muito similar a outras no país- optarom por aplaudir a manifestaçom no seu breve percurso pola cidade, primeiro, e depois por unir-se à mesma. Ademais, diversos colectivos e organizaçons ecologistas apoiarom também esta primeira mobilizaçom contra as touradas com a sua presença.

Muitas pessoas asistentes mostravam a sua surpresa ou indignaçom ante a presença policial, nom só polos carros da Polícia Local, se nom dous carros da Polícia “Nacional”, umha carrinha e muitos agentes –que tomavam notas sobre os conteúdos das pancartas, como se fossem delitivas-, incluidos agentes à paisana. Resulta patético e rejeitável que as “forças da orde” amparem e protejam os intereses de empresas privadas, como já se comprovou no último mes, e dediquem os seus esforços a controlar os movimentos populares, quando os motivos da mobilizaçom eram claros, públicos e tam justos como exigir o fim da tortura aos animais.

Ademais, um agente à paisana informou ali mesmo, com atitude chulesca e sem identificar-se, de jeito que parecia um simples mafioso, da intençom do governo espanhol de punir a manifestaçom com 15.000 euros de multa sobre os seus promotores, polo que já vemos que adoptam as sançons depois dumha grande reflexom e ponderando todas as circunstáncias. Para as Administraçons públicas as antitaurinas somos culpáveis (nom se sabe muito bem de que) até que se demostre o contrário, mentres invistem milheiros de euros en financiar e subsidiar as touradas com cartos públicos, já que do contrário nom resistiriam até o dia de hoje.

Da Plataforma amosamos a nossa satisfacçom com o povo de Ponte Vedra, que demostrou na rua o seu rejeitamento a esta barbarie. Mas também sabemos que nom foi se nom um primeiro passo, que a luita nom remata até que dessapareçam as touradas; con todo, aguardamos que as administraçons (nomeadamente o Concelho, em primeiro lugar) tomem boa nota do acontecido e deam passos inmediatos nesta direcçom. A táctica das sançons, escolhida polo governo espanhol para defender a sua negra Festa, poderá supor umha sangria económica para o activismo social, mas também é um fracasso anunciado. De Ponte Vedra Antitaurina pretendemos dar continuidade à mobilizaçom anti-touradas no encerramento da Feria Taurina em vindouros anos, convertendo esta data em referencial no calendário de mobilizaçons animalistas em todo o país. Contamos para isso contigo e, de novo, com os colectivos que nos apoiarom e aos que agradezemos enormemente a súa participaçom.

Locais taurinos no ponto de mira. Nom colabores com eles!!!

pontevedraantitaurina — Mon, 11 Aug 2008 09:13:54 +0000

A passada quinta-feira dia 7 de agosto conhezidos locais e estabelecimentos da cidade que apoiam à “Coordinadora de Peñas Taurinas” fôrom assinalados por serem colaboradores económicos das touradas e, polo tanto, responsáveis da tortura animal que vimos denunciando.

Colantes com a legenda “ Este local apoia a tortura taurina. Nom colabores” aparecêrom justo acima das suas portas e janelas assim como sobre muitos dos cartazes que os identificam como “Local Colaborador”.

O capitalismo acredita na ideia de que há possibilidade e necessidade de fazer negócio com qualquer cousa, mas muita outra gente nom. 24 touros torturados e assassinados com umha crueldade arrepiante e dolorossíssima nom é, nem muito menos, actividade para lucrar-se. A falta de escrúpulos que caracteriza as inversons privadas tenhem que ser denunciadas independentemente de que a quantidade invertida seja menor ou maior. Simplesmente porque se colaboras com a tortura, és torturador.

Por todo isto, a Plataforma Antitaurina de Ponte Vedra apoia estas iniciativas e pide o boicote a todos estes locais taurinos, porque tomar umha copa alí significa donar umha parte dos teus cartos para financiar a tortura animal.

Nom colabores com eles!!

Dúas varas para medir

pontevedraantitaurina — Sun, 10 Aug 2008 10:23:49 +0000

A Xunta multou con 600 euros unha carreira con catro porquiños engraxados en Barbadás. A decisión da Dirección Xeral de Conservación da Natureza parece lóxica e merece o noso apoio, mais os veciños da Valenzá xa preparan alternativa para o ano que vén: transportarán uns cochos desde unha devesa a centos de quilómetros, para encerralos nun caixón negro e levalos até Barbadás, onde anunciarán un novo espectáculo en centos de paneis metálicos.

Iso si, o novo cambio esixirá un traballo previo máis intenso, compensado pola posibilidade de cobrar entrada. Os animais xa morren de medo só coa estrés desa longa viaxe, mais tamén receberán continuas malleiras con sacos de area e daranlle fortísimos purgantes que lles abrasarán o intestino e causarán diarreas sanguinolentas. Quizais tamén se lles administren fármacos para debilitalos ou se lles serren os dentes cos que poden defenderse. Cortaranlle as pezuñas para impedir que fiquen parados e botaranlle nelas trementina queimante. Ademais, untaranlle vaselina nos ollos para que teñan unha visión borrosa. Por último, introduciranlle bolas de algodón nas fosas nasais para dificultar a respiración.
O espectáculo pagará a pena e superará con moito a carreira do ano pasado. Despois dos preparativos, sairán os cochos, xa asustados e feridos, a un cenario ocupado por unha multitude a berrar. Unha vez alí, un picador clavaralle unha lanza no lombo para destruir músculos, vasos sanguíneos e nervos. A continuación, clavaranlle unhas banderillas que seguirán dentro do corpo do animal cada vez que se mova, de xeito que prolongue a súa dor. Non hai límite para as banderillas, tantas como ature o cocho para ficar suficientemente consciente. Despois será o turno do heroe, alentado na prensa local, o que mareará un animal xa víctima do esgotamento. Despois de torturalo un pouco máis, clavaralle unha espada de 80 centímetros, para destrozarlle o fígado, os pulmóns, a pleura ou as arterias, segundo cadre. Se non remata de morrer, clavaranlle repetidamente estocadas na medula espiñal coa puntilla, aínda que cabe a posibilidade de cortarlle unha orella mentres aínda agoniza.

A asociación veciñal confía en recibir xenerosos fondos públicos con este cambio na atracción das festas, que pasarán a se incluir no programa de promoción turística e será presidida por algún cargo político, mentres a Consellaría de Medio Ambiente a considerará apenas unha tradición máis, e quizais a Dirección Xeral de Turismo as subvencione tamén. Todo co aplauso xeral dos meios de comunicación locais. Só lles preocupa que quizais alguén proteste e considere a festa unha tortura contra os animais -no fondo, unha mostra de incultura das persoas que non aprezan esta festa, esta arte que case é unha ciencia-, mais confían no traballo das forzas policiais, que están para atallar estas cousas.