Coordenadora Antitouradas de Pontevedra » videos

Precinto simbólico da praza de touros de pontevedra

pontevedraantitaurina — Thu, 05 Aug 2010 20:16:43 +0000

FAI CLICK NA IMAXE PARA VERES O VIDEO

A Coordenadora Antitouradas precintou simbolicamente a entrada principal da praza de touros da cidade, demandando a modificación da lexislación autonómica en materia animal e a consecuente abolición das touradas. Desta volta, non houbo incidentes cos donos da praza, tal e como sucedera no 2009, e foi salientábel a presenza dos medios de comunicación.

Da Coordenadora aproveitamos para vos convidar a unha proxección de materiais antitaurinos que terá lugar o sábado 7 de agosto ás 20h no centro social Revira (Gonzalo Gallas,4), un acto que porá fin a esta semana de loita antitouradas.

Éxito da manifestación antitouradas´2010

pontevedraantitaurina — Thu, 05 Aug 2010 00:07:11 +0000

FAI CLICK NA IMAXE PARA VERES O VIDEO

Máis dun milleiro de persoas participaron na mobilización celebrada o pasado sábado en Pontevedra para esixir a abolición das touradas, en coincidencia co inicio da feira taurina, que deixou un saldo de doce touros torturados no seu primeiro fin de semana. Máis un ano, o movemento antitouradas demostra que continúa a avanzar na erradicación desta lacra.

Clique para ver o slideshow.

A marcha partiu pouco despois das 20:00 da Praza da Peregrina, onde rematou unha hora despois, tras percorrer parte do casco histórico e a zona nova da cidade. A Coordinadora Antitaurina de Pontevedra, unha das entidades convocantes, portou varias faixas co significativo lema “Hoxe rexeitamos, mañá aboliremos”. A marcha foi convocada pola Coordenadora Antitouradas e mais pola APDR , ADEGA, BRIGA, C. Ecoloxista do Salnes, CNT , C.S Revira, Galiza Nova, Plataforma Antitouradas de Pontevedra, Nos-Up, Os Chichisos, Protectora “Os Palleiros”, Vaipolorio, Verdegaia. Participaron tamén diversos colectivos ecoloxistas , como Galicia Mellor Sen Touradas ou a protectora de Marín, entre outros.

Ao longo do percorrido, desenvolvido ao longo dunha cidade en festas -nas que as touradas só son seguidas por unha minoría- insistiuse no lema escollido para a faixa de cabeceira (A tortura nin é arte nin cultura) entre outros que pedían a supresión das touradas. Na mente de todos os participantes estaba moi presente a recente prohibición das touradas na Cataluya -agradecida expresamente en diversas consignas e pancartas- por medio da aprobación dunha ILP.

A manifestación rematou coa lectura do manifesto elaborado entre as organizacións convocantes, no que se reclama a modificación da Lei de Protección de Animais Domésticos ou Salvaxes en Cautividade (que expresamente exclúe as touradas do seu ámbito de aplicación) para abolir este espectáculo, o final das axudas públicas ás corridas ou a declaración da cidade como amiga dos animais, entre outras medidas, e anímase á sociedade a continuar as mobilizacións ata acadar estes obxectivos.

Manifestación Histórica contra as touradas en Pontevedra

pontevedraantitaurina — Sun, 02 Aug 2009 18:59:06 +0000

FAI CLICK NA IMAXE PARA VER O VIDEO

Desde a Coordenadora Antitouradas queremos agradecer aos diferentes colectivos participantes, así como ao medio milleiro de persoas que secundaron a nosa mobilización, o seu apoio e compromiso activos coa causa da erradicación das touradas, superando con creces a cifra de asistentes no ano 2008 e conseguindo a maior demostración de oposición ás touradas na historia da cidade. Algúns xornais, como “La Voz de Galicia”, nunha mostra de “profesionalidade” e “veracidade informativa”, reduciron a 40 os participantes, mentres que Xornal de Galicia sí que daba conta da cifra real de asistentes. De todas formas, a todos e todas vós, que facedes posíbel o soño dunha Pontevedra libre do maltrato e sadismo cara os touros: grazas. (a crónica continúa despois da galería de imaxes que podedes ver a continuación)

Minutos antes das 19h da tarde, dúcias de persoas ían chegando á praza da Peregrina para se concentraren e saíren contra as 19:20h en manifestación polas rúas da cidade. Os diferentes colectivos despregaban as súas faixas, a meirande parte delas con motivos alusivos á degradante “festa” dos touros, mentres un gaiteiro amenizaba a mobilización xa desde o comezo. Durante o traxecto puidéronse escoitar diferentes palabras de orde, tal como: “A tortura non é festa nen cultura”, “Ilegalizar o maltrato animal”, “non son artistas, son asasinos” ,”touradas fóra da Galiza” ou “festas populares, sen atrocidades”. A manifestación creou expectación na rúa, e numerosas persoas ían uníndose conforme avanzaba polo centro de Pontevedra. Ao finalizar deuse lectura ao manifesto (que adxuntamos liñas abaixo) e agradeceuse a participación dos colectivos e manifestantes. Na mesma tarde, tres matarifes torturaban os primeiros seis touros dos 24 que serán asasinados nestas dúas fins de semana.

Moitos dos participantes adquiriron antes do comezo os panos verdes editados pola Coordinadora Antitouradas, para subvertirmos así o significado que os pro-touradas conceden ás festas de agosto na cidade, e en particular o fenómeno das “peñas” xuvenís. A marcha percorreu o centro de Pontevedra entre consignas pola abolición da tauromaquia e en defensa dunhas festas populares e sen touradas, para rematar na mesma praza uns tres cuartos de hora despois, onde tres activistas da Coordinadora agradeceron os numerosos apoios recibidos e leron o manifesto, con reivindicacións concretas dirixidas ás institucións.

No entanto, as administracións públicas continúan a colaborar na pervivencia desta barbarie. Á mesma hora que centos de manifestantes ocupaban as rúas, destacados cargos públicos (incluidos o presidente da Xunta Núñez Feijoo, o da Deputación, Rafael Louzán e o ministro de Fomento, José Blanco, así como o Delegado do Goberno, Antón Louro) decidían ratificar publicamente o seu apoio á tortura de animais como divertimento coa súa presenza na praza de touros.

A manifestación demostra que o movimento antitouradas medra ano tras ano, ao consolidarse a oposición social a unha festa baseada no sofrimento dos animais, a pesar do maioritario silenciamento mediático, que chega ata o extremo de non aproveitar o traballo realizado polos seus reporteiros gráficos. Trátase dunha carreira de fondo que só ten un final posíbel: a erradicación desta lacra da nosa cidade. Estamos seguros de que o conseguiremos.

A continuación colamos o manifesto:

MANIFESTO DA COORDENADORA ANTITOURADAS DE PONTEVEDRA

Hoxe en día, mais do que nunca, a sensibilidade perante o maltrato animal debería formar parte do noso ideario colectivo. As touradas representan o paradigma máis cínico deste sofrimento, elevando a nivel de espectáculo a crueldade especista.

Na nosa cidade, nestas dúas fins de semana, serán masacrados vintecatro touros co disfrute dalgúns, a pasividade doutros e o rexeitamento de gran parte da sociedade. As touradas en Galiza contan cunha presenza decadente e unha curta historia, sendo apoiadas por algúns dos sectores mais reaccionarios , e promovidas por empresarios sen escrúpulos, como é o caso dos irmáns Lozano na nosa cidade.

Desde a Coordenadora Antitouradas de Pontevedra recollemos o legado doutros focos de loita antitaurina en Galiza que xurdiran nos últimos tempos, como foi a Plataforma Antitaurina Galega e mais recentemente a iniciativa “Galicia Mellor sen Touradas”, e denunciamos:

- O trato cruel e inhumano que os touros receben no transcurso desta mal chamada festa, na cal o touro é desgarrado, mutilado e torturado até morrer, así como o maltrato animal en xeral.

- A obscena utilización de fondos públicos para o financiamento das touradas (42 euros por habitante, segundo “Libera”), a pesar de que as enquisas (Gallup 07) amosan que o 86% da poboación galega se declara indiferente perante este atavismo.

- As touradas como coartada para a construcción da identidade española en Galiza. Nengunha identidade se pode construír en base ao sofrimento dun animal.

- A forte componente machista das touradas, ao exaltar a figura masculina nunha loita contra un animal mitificado na que o home sae sempre vitorioso.

- O cinismo das Leis españolas e galegas, onde as disposicións legais exclúen taxativamente as touradas do ámbito da súa acción, cando as propias leis están xustificadas por criterios éticos ou morais.

Por tanto, demandamos:

1. O cese inmediato de axudas encobertas ás touradas por parte de todas as Institucións, nomeadamente a Deputación de Pontevedra, principal soporte público na nosa cidade.

2. Que a Xunta de Galiza aprobe unha “Lei de Protección Animal” que proíba as touradas e espectáculos onde se torture ou mate animais.

3. A supresión das touradas como reclamo turístico por parte das Institucións Públicas, así como dos programas de festas editados polo noso Concello, ademais da declaración de Pontevedra como “Cidade Antitouradas e amiga dos Animais”.

4. O uso de espazos públicos para a promoción das touradas.

5. A reconversión da Praza de Touros nun Coliseu para espectáculos culturais e concertos, así como a eliminación de toda a simboloxía taurina presente na cidade.

Desde a nosa Coordenadora solicitamos ás peñas responsabilidade e reflexión perante o uso do maltrato e a barbarie como motivo de celebración.

Por isto, chamamos á cidadanía a amosar publicamente o seu rexeitamento ás touradas e convidamos a participar nas actividades programadas pola Coordenadora, entre as cais queremos convidarvos expresamente ao Encierro antitaurino que terá lugar o mércores 5 ás 8 horas da tarde entre as prazas de San Xosé e a Peregrina. Non esquezades traer as pañoletas antitouradas!

Finalmente , dámosvos as grazas pola vosa participación na mobilización de hoxe. Pasamos a ler a listaxe de apoiantes da convocatoria:

A plataforma “Galicia Mellor sen Touradas“, que aglutina 20 colectivos, a asociación animalista “Matar por Matar Non” , a protectora “Os Palleiros“, a asociación animalista “Libera“, o PACMA (Partido Antitaurino contra o maltrato animal), Verdegaia, a ONG Amarante, Amigos da Terra, Isca! , Assembleia da Mocidade Independentista, Acçom Antifascista, Galiza Nova , a A.C Revira , a LNB (Liga Nacional de Billarda) a A.C. Almuinha de Marín, así como o colectivo de Sarria e Lugo que organizou a manifestación antitouradas en Outarela hai un mes, os voluntarios do Refuxio de Animais Abandonados de Ponteareas – Colectivoanimal (Asociación Protectora Sen Fronteiras), Asociación Protectora Moura, e tamén nos envía o seu apoio o “Colectivo Andaluz contra el maltrato animal”.

Pola fin das touradas da nosa cidade!

Empresarios taurinos ameazan e tentan agredir á membros da Coordinadora Antitouradas de Pontevedra

pontevedraantitaurina — Thu, 30 Jul 2009 17:38:26 +0000

FAI CLICK NA SEGUINTE IMAXE PARA VER O VIDEO

“A tauromaquia é o malfadado e venal arte de torturar e matar animais en público. Traumatiza aos nenos e aos adultos sensibles. Agrava o estado dos neurópatas atraídos por eses espectáculos. Desnaturaliza a relación entre o home e o animal. Constitúe un desafío á moral, a educación, a ciencia, a cultura…”.

Unesco, 1980

Un dos numerosos actos realizados pola Coordinadora Antitouradas de Pontevedra tivo un final inesperado na mañá de hoxe, debido á agresividade dos que enchen os seus petos co sufrimento animal. A plataforma contra estes festexos precintou simbolicamente unha das portas de entrada da praza, co lema “precintado por tortura”, para anticipar unha realidade que agardamos que chegue máis cedo que tarde, e ordenada polas administracións públicas que agora amparan este cruel espectáculo.

No entanto, os empresarios taurinos agardaron a que marcharan os reporteiros gráficos para ameazar e tentar agredir aos integrantes da Coordinadora. Non se limitaron a retirar o precinto da porta entre insultos, senón que un dos presentes chegou a solicitar a outro, en claro ton ameazante, que “le acercase una escopeta”, ademais de proferir insultos orixinais como “cagones”, “portugueses” ou esixir “que habléis en español”.

A continuación, achegáronse violentamente contra os manifestantes e tentaron agredir ao que portaba unha videocámara, que estaba rexistrando o acto. Un dos empregados mesmo portaba un pao co que tentou golpear a un dos manifestantes.

Os empresarios das touradas non querían que ficase constancia documental da súa actitude prepotente e ofensiva, polo que advertiron ao cámara que lle ían “hinchar la cara a hostias”. Anteriormente, os empresarios xa restrinxiran o traballo dos medios de comunicación ao coñecerse as lesións que sofreu un touro cando era transportado cara ao seu lugar de martirio. Afortunadamente, a maior cordura dos contrarios á tortura animal impediu que o incidente pasase a maiores.

A responsabilidade dos irmáns Lozano

Na trifulca chegou a intervir Eduardo Lozano, empresario de Toledo que é o donos da praza a través da sociedade que comparte cos seus irmáns, pero non para calmar os ánimos, senon para tentar expulsar da rúa aos integrantes da Coordinadora.

Os irmáns Lozano adquiriron a praza de touros a finais dos 70, cando só se celebraba unha corrida, para recuperar unha barbarie en declive. Así, lograron aumentar os seus obscenos beneficios, en grande medida grazas ás axudas públicas, a costa da morte de máis touros segundo pasaba o tempo: 12 animais nos 80, 18 nos 90 e os 24 bóvidos asasinados cada verán desde hai algúns anos; unha triste bagaxe de máis de medio milleiro de touros mortos baixo a tortura incesante das banderillas e a espada.

Estes empresarios da tortura son mesmo repudiados no submundo da tauromaquia por numerosas irregularidades legais, débedas acumuladas e uns métodos e actitudes caracterizados pola “prepotencia e abuso de poder” (segundo os propios “matadores”), o que no seu momento levou á xustiza a anularlles a concesión da praza madrileña de Las Ventas.

Non resulta sorprendente en absoluto que quen considera ético lucrarse da tortura dos animais careza tamén de educación e respeto polas persoas. Carentes de empatía cun animal torturado ata a morte, carecen dela para comprender aos seus semellantes que lles reprochan tal atrocidade. En todo caso, non pensamos ceder á coacción e renunciar ás nosas liberdades de expresión, reunión e manifestación, nin temos que tolerar insultos e ameazas como as escoitadas na mañá de hoxe, motivo polo cal nos decidimos a facelos públicas. A pesar do violento intento de censura, a Coordinadora ten imaxes gravadas de todo o incidente –que son accesíbeis no noso web- polo que a súa veracidade está fora de toda dúbida.

Continúan os preparativos da mobilización

A iniciativa en prol da erradicación das touradas prosegue o seu traballo en prol da difusión social da convocatoria de mobilización, o próximo sábado 1 de agosto ás 19 horas na Praza da Peregrina. Ducias de faixas en pontos estrátexicos da cidade, centos de cartaces, e mesas informativas diarias convocan á cidadanía a expresar unha rotunda oposición a esta barbarie que quer disfarzar-se de cultura ou tradición.

Roteiro Antitouradas – A coordenadora reivindica a fin das touradas perante as institucións

pontevedraantitaurina — Wed, 29 Jul 2009 18:33:01 +0000

A Coordinadora contra as Touradas de Pontevedra organizou un roteiro reivindicativo que percorreu as principais institucións públicas que teñen responsabilidades, dun ou doutro xeito, na pervivencia deste espectáculo de tortura animal na nosa cidade. A actividade serve de preludio á manifestación convocada este sábado ás 7 da tarde (desde a Peregrina), na que se agarda a presenza de centos de persoas, fartas desta “tradición” que nada ten a ver nin coa arte nin coa cultura.
A xornada comezou na delegación da Xunta de Galiza en Campolongo, onde se entregou un escrito no que se esixía a promulgación dunha lei de protección animal que inclúa especificamente as touradas entre as práticas prohibidas.

Acompañados en todo momento dunha faixa co lema “Touradas fora de Pontevedra”, a ducia de persoas participantes na iniciativa dirixíronse cara o Concello, onde se reclamou unha declaración de “Cidade Antitouradas” e amiga dos animais, a supresión do evento do programa de festas e a retirada do espazo público da propaganda que incite á matanza de touros.

Faltaban aínda no percorrido a Subdelegación do Goberno e a Deputación de Pontevedra. A ambas institucións reclamámoslles que deixen de subvencionar as touradas ou asociacións que promovan o maltrato animal con fondos públicos.

Por último, achegámonos ata a praza de touros. A Coordinadora reclama a súa reconversión nun coliseu para actos culturais, no momento en que nos libremos desta vergoña, cando as touradas pasen a formar parte dun pasado negro xa superado.

Nestes días, a Coordenadora continúa a pegada masiva de cartaces anunciando a manifestación e segue a instalar en horario de mañá e de tarde a súa mesa informativa na Praza da Peregrina, tendo de momento unha moi boa acollida entre a cidadanía a recollida de sinaturas e visualizando a actividade do noso colectivo. E recordade, o día 1 às 19h na Peregrina, Manifestación Antitouradas en Pontevedra!!

Notável éxito na mobilizaçom do 9-A e ameaças de sançons económicas

pontevedraantitaurina — Wed, 13 Aug 2008 10:55:48 +0000

Podes ver o vídeo em maio tamanho e qualidade em GzVídeos.

A mobilizaçom de Ponte Vedra Antitaurina congregou centos de pessoas no sábado, mesmo minutos antes da hora agendada, às 7 da tarde, momento no que começavam a torturar um dos 12 animais assassinados na fim da semana na Praça de Touros.

A Peregrina, ateigada por centos de pessoas que viviam as festas da cidade, acolheu umha mobilizaçom histórica, que no entanto repressentou apenas um primeiro passo no caminho de agitamento social, que rematará mais cedo que tarde por expulsar a tortura animal da nossa cidade. As consignas de orde, que se sucederom em todo momento, avogavam pola aboliçom das touradas da cidade e de toda a Galiza e assinalavam responsabilidades assassinas nos matarifes conhecidos como toureiros. A concentraçom partiu da Peregrina e realizou um breve percorrido pola cidade, para rematar na mesma praça, onde se agradeceu a presença de todas as pessoas asistentes e se leu o manifesto da plataforma.

Salientava a presença maioritária da juventude, que na sua imensa maioría rexeita já esta negra “tradiçom” da tristemente chamada “Festa Nacional” polo franquismo. De facto, muitas das pessoas participantes no fenómeno lúdico das penhas –que dum jeito interesseiro se vincula sempre às touradas, quando nom é mais do que umha manifestaçom festiva com predomínio da bebedeira, muito similar a outras no país- optarom por aplaudir a manifestaçom no seu breve percurso pola cidade, primeiro, e depois por unir-se à mesma. Ademais, diversos colectivos e organizaçons ecologistas apoiarom também esta primeira mobilizaçom contra as touradas com a sua presença.

Muitas pessoas asistentes mostravam a sua surpresa ou indignaçom ante a presença policial, nom só polos carros da Polícia Local, se nom dous carros da Polícia “Nacional”, umha carrinha e muitos agentes –que tomavam notas sobre os conteúdos das pancartas, como se fossem delitivas-, incluidos agentes à paisana. Resulta patético e rejeitável que as “forças da orde” amparem e protejam os intereses de empresas privadas, como já se comprovou no último mes, e dediquem os seus esforços a controlar os movimentos populares, quando os motivos da mobilizaçom eram claros, públicos e tam justos como exigir o fim da tortura aos animais.

Ademais, um agente à paisana informou ali mesmo, com atitude chulesca e sem identificar-se, de jeito que parecia um simples mafioso, da intençom do governo espanhol de punir a manifestaçom com 15.000 euros de multa sobre os seus promotores, polo que já vemos que adoptam as sançons depois dumha grande reflexom e ponderando todas as circunstáncias. Para as Administraçons públicas as antitaurinas somos culpáveis (nom se sabe muito bem de que) até que se demostre o contrário, mentres invistem milheiros de euros en financiar e subsidiar as touradas com cartos públicos, já que do contrário nom resistiriam até o dia de hoje.

Da Plataforma amosamos a nossa satisfacçom com o povo de Ponte Vedra, que demostrou na rua o seu rejeitamento a esta barbarie. Mas também sabemos que nom foi se nom um primeiro passo, que a luita nom remata até que dessapareçam as touradas; con todo, aguardamos que as administraçons (nomeadamente o Concelho, em primeiro lugar) tomem boa nota do acontecido e deam passos inmediatos nesta direcçom. A táctica das sançons, escolhida polo governo espanhol para defender a sua negra Festa, poderá supor umha sangria económica para o activismo social, mas também é um fracasso anunciado. De Ponte Vedra Antitaurina pretendemos dar continuidade à mobilizaçom anti-touradas no encerramento da Feria Taurina em vindouros anos, convertendo esta data em referencial no calendário de mobilizaçons animalistas em todo o país. Contamos para isso contigo e, de novo, com os colectivos que nos apoiarom e aos que agradezemos enormemente a súa participaçom.

Contigo podemos (novo vídeo de Ponte Vedra Antitaurina)

pontevedraantitaurina — Sat, 09 Aug 2008 09:36:39 +0000

Vídeos da campanha de Pontevedra Antitaurina

pontevedraantitaurina — Tue, 22 Jul 2008 17:16:05 +0000

Pontevedra Antitaurina apresenta dous vídeos para acompanhar a nossa campanha antitaurina.

Link ao original

Copia e cola para incluír no teu blogue: ">wordpress ">outros blogues Click To Play ">outra opçom

Youtube: http://br.youtube.com/watch?v=brXj7MfPmvY

Link ao original

Copia e cola para incluír no teu blogue: ">wordpress ">outros blogues Click To Play ">outra opçom

Para maior qualidade, accedei a gzvideos.info

Antitaurinos de Equanimal saltan á praza de Las Ventas Madrid

pontevedraantitaurina — Sun, 04 May 2008 11:16:57 +0000

O 4 de Maio de 2008 seis activistas de Equanimal saltaron ao ruedo das Ventas (Madrid) durante unha corrida de touros. Estaba sendo retransmitida en directo por TV. Era a primeira vez que unha organización polos dereitos dos animais plantaba cara ao mundo taurino no corazón mesmo da tauromaquia.

A impunidade das prazas de touros rematou. Xa nada será igual. O meios de comunicación resaltaban que esta acción marcaba un antes e un despois no activismo antitaurino. Equanimal tomara a praza de touros máis importante do mundo.

Con esta acción non violenta Equanimal conseguía atraer a atención dos medios de comunicación. Noticiarios de televisión e radio, prensa escrita e medios dixitais facíanse eco da noticia. O obxectivo estaba cumprido: dar un golpe de efecto para nova revitalizar o debate sobre a abolición da tauromaquia.

“Durante as semanas previas á acción preparámosnos concienzudamente para que todo saíse ben. Foi un intenso traballo de investigación e recollida de datos. Varios activistas repartíanse os diversos traballos necesarios para que o asalto ao ruedo chegase a bo fin. foi un duro golpe para o mundo taurino: xamais pensaron que unha organización defensora dos animais atrevésese a saltar ao ruedo máis importante do mundo. Foi o primeiro asalto ao ruedo. Pero haberá máis.”

vía: asaltoalruedo

Crónica dunha morte anunciada

pontevedraantitaurina — Wed, 15 Aug 2007 23:42:04 +0000

O TOURO NON SOFRE:

Video de Liberaong , parte dunha serie de varios capítulos sobre as touradas en Barcelona. É bastante duro, avísamosvolo, mais amosa á perfección o grao de sadismo ao que chegan os promotores e executores deste ruín espectáculo.

Eis a descrición do “proceso”:

Logo de burlar ao animal co capote, o picador crávalle nas costas a “puya”, unha lanza que esnaquiza músculos (trapecio, romboideo, espinoso, semiespinoso, serratos, transversos do pescozo, etc. Lesiona ademais vasos sanguíneos e nervios, abríndolle grande boquetes, por onde logo poden afundirse as banderillas, uns paus terminados en arpóns de aceiro cortante e punzante, de 6 ou 8 cm. de lonxitude. Algunhas banderillas de máis lonxitude son denominadas “de castigo” , utilizadas cando o touro logrou evadir a lanza do picador. As banderillas prolongan o desgarramento e afondamento das feridas interas. Non hai límite ao número de banderillazos: tantos como sexan necesarios para desgarrar os tecidos e pel do touro.
A perda de sangue e as feridas da espiña dorsal impiden que o touro erga a cabeza de maneira normal, e é cando toureiro pode achegarse. Co animal xa perto do agotamento, o toureiro non se preocupa do perigo e pode darse o luxo de retirarse do touro despois dun pase especialmente “artístico botando fóra o peito e fachendeando ao recibir os aplausos do público.
“Logo atravesan ao touro cunha espada de 80 cm, que pode esnaquizarlle o corazón, o fígado, os pulmóns, a pleura, etc., segundo o lugar polo que penetre no corp o do animal. De feito, cando esnaquiza a arteria aorta, o touro agoniza con enormes vómitos de sangue.

“O animal, nun intento desesperado por sobrevivir, resístese a caer, e pola súa gran memoria adoita encamiñarse cara á porta pola que entrou (porta de “chiqueros”), buscando a saída pola que fuxir de tanto maltrato e dor. Pero entón apuñálano na caluga co descabello”.

“Malia estes terribles tormentos, o animal non adoita morrer, pola súa gran potencia física, pero finalmente cae ao chan. Entón remátano coa puntilla, un coitelo-puñal de 10 cm, co que intentan seccionarlle a medula espinal, á altura das vértebras atlas e axis.

“O touro queda así paralizado, sen poder sequera realizar movementos cos músculos respiratorios, polo que morre por asfixia.”

A MORTE DO TOURO
Fonte: Dr. Enrique Rubio

O tema concreto da morte do touro na praza, desde o punto de vista estrictamente físico, non aparece descrito (e case nin tratado) nos textos ou informes sobre o tema. De feito, os propios” toreros” ao parecer tampouco saben nada respecto diso, e ata é unha cuestión para esquivar. Boa parte do que se describiu no apartado anterior está encamiñado a garantir ao máximo o momento de matalo, e nada é accidental ou simplemente “estético”.

Para matar ao touro hai que entrar na súa caixa torácida por detrás, literalmente hai que “matalo por detrás”, e romper un dos grandes vasos que transportan o seu sangue, que é o que o mantén vivo. Para iso o pobre animal debe dar as facilidades necesarias, colocándose de forma que o estoque penetre polo único sitio posible e o mate. A “faena” do torero consiste en facer que se coloque así, xa que doutra forma a arma cravaríase nun óso (o que eles chaman “pinchar”).

O animal, como se ve na primeira fotografía deste bloque, debe estar coa cabeza baixa (para ofrecer un branco amplo e despexado) e as pezuñas dianteiras xuntas (para que as clavículas se separen o máis posible e o oco de entrada sexa grande). Para conseguir este resultado, o torero vaino “humillando” (ensinándolle a baixar o fuciño), axudado polo propio cansazo do animal e as lesións da puya.

O obxectivo son os vasos que entran e saen dos pulmóns. Se se cercena a arteria, a agonía será máis rápida, pero se é a vena, entón o torero conseguiría unha morte lenta, chea de estertores, horrible e, para os afeccionados, “pouco estética”. Indicar que os toreros diestros de cando en cando acertan coa arteria aorta.

A perforación dun pulmón, cando é unha estocada lateral ou inclinada lateralmente, provoca a morte por desangramiento, e o touro adoita sangrar pola boca de forma abundante.

Despois de que lle esnaquicen as vértebras, o touro perde o control sobre o seu corpo desde o pescozo cara abaixo; con todo, cara arriba mantense intacto, polo que está consciente de cando se lle corta o rabo, as orellas e os testículos, así como de cando é arrastrado lonxe do ruedo. Estes serán, pois, os seus últimos segundos de vida. Os seus últimos e tan desexados segundos que porán fin a tanto sufrimento e dor.

A “suerte de varas”, pola súa banda, é unha brutalidade engadida: un corpo de varios centos de quilos, que se despraza a unha velocidade próxima aos 40 km/h, e que é detido de forma brusca polo “tope” que significa o cabalo do picador. A enerxía deste choque transmítese ao cráneo, á columna cervical, ao cerebro e á medula. Isto sen mencionar a parte que lle corresponde ao cabalo.

Respecto os cabalos dos picadores, elíxense a cabalos que xa non teñen valor comercial, así que o animal morre en 3 ou 4 corridas ao moito. É moi habitual que o animal sufra roturas múltiples de costelas ou destripamentos. Dróganos e énchenlles as orellas con papel de xornal mollado para que saian á praza, xa que o terror faríaos saír correndo.

Desde 1925 colócanlles un peto simulando protección, pero en realidade trátase de que o publico non vexa as feridas do cabalo que con frecuencia presentan exposición de vísceras (algunha vez chegáronlle a introducir de novo os intestinos e a coserlles a tripa para que aguanten outra corrida). Ademais, para que non relinchen de espanto e de dor (e non molesten ao respectable público), amputaron as súas cordas vocais, e se atemorizados polo pánico se negan a volver ao “ruedo”, queimáranlles os testículos con descargas eléctricas ou xornais acesos, e ata lles quitarán os ollos.

A mancadura que a puya lle fai ao touro pode cualificarse de dramática. Estamos falando dunha hemorraxia de varios litros de sangue acompañado de destrozos musculares e partes brandas do corpo.

“Só é explicable que o touro siga vivo e con bravura, pola síntese de sustancias analxésicas (aschamadas endorfinas (1), ou morfinas internas) que deben ir paralelas á produción dunha enorme cantidade de adrenalina que necesita para manter a súa agresividade

(2). “A adrenalina producida polo touro é tan abundante, que cando manipulei os seus restos, o cheiro a adrenalina nas mans duroume varios días.” (Dr. EnriqueRubio)

(3) Os datos aportados polo Dr. Illera no seu estudo demostran que o touro libera durante a lidia dez veces máis betaendorfinas que un ser humano, unha cantidade extraordinaria, que obviamente necesita para paliar un extraordinario sufrimento, punto que outorga a razón con datos científicos a quen afirmamos que é unha crueldade.

Artigo orixinal de Altarriba e Antitauromaquia.es

Tradución de Pontevedra Antitaurina.

Fotos: cop. SHARK, ACTYMA, CRAC