Coordenadora Antitouradas de Pontevedra » plataforma

Convocada a manifestación antitouradas 2011 para o 13 de agosto (e xa van 4 anos!)

pontevedraantitaurina — Tue, 02 Aug 2011 23:59:20 +0000

Por cuarto ano consecutivo vai ter lugar a xa tradicional manifestación antitouradas, que baixo o lema “Touradas fóra de Pontevedra” e froito da dinámica asemblear e unitaria iniciada no ano anterior levará ás rúas da cidade a oposición á barbárie taurina e a demanda da abolición da tauromaquia. Será o sábado 13 de Agosto ás 20h con saída e remate na praza da Peregrina.

evento en facebook

A presentación pública da campaña 2011 tivo lugar o pasado1 de Agosto no local da Apdr (Asociación pola Defensa da Ría), á que acudiron numerosos medios locais. Ademais da manifestación do día 13, os membros/as da asemblea unitaria anunciamos a entrega das demandas antitaurinas ás diferentes administracións responsábeis no rexistro da Subdelegación do Goberno español en Pontevedra. Será o o próximo xoves 4 de Agosto ás 11 h. Tamén se realizarán diferentes accións de denuncia que serán convocadas en próximas datas, así como a edición de folletos informativos e cartaces. (podes descargalos ao final do artigo)

Da asemblea unitaria e aberta ”Touradas fóra de Pontevedra” convídase á participación de todas e todos aqueles/as que simpaticedes coa causa. Será este mércores 3 ás 20:30h no local dos sindicatos en Pontevedra.

A continuación o manifesto 2011 e descarga de materiais:

A TORTURA NON É ARTE NEN CULTURA

pola abolición das touradas

As touradas están baseadas na tortura, a dor e o ensañamento do touro. Transmiten valores negativos, como o uso inxustificado da violencia, o desprezo cara os dereitos dos animais, o goce coa tortura e o maltrato animal. Segundo a Declaración Universal dos Dereitos dos Animais, artigo 11:”todo acto que implique a morte dun animal sen necesidade é un biocidio”.

As tradicións deben funcionar como soporte do que nos define, mais tamén do que esperamos do futuro. Aquelas que están sustentadas na violencia e no aniquilamento non fan máis que perpetuar comportamentos que deben ser rexeitados da sociedade.

Ademais, para os galegos e galegas, as touradas non teñen nada que ver coa nosa historia nen coa nosa cultura, chea de tradicións populares que esmorecen e que sí son dignas de recuperación.

As temporadas taurinas, as escolas e as gandarías son financiadas con diñeiro público que tamén pagamos as galegas e os galegos, que somos os que menos interese temos nas touradas en todo o Estado.

Segundo diversas enquisas, o 90% consideramos que a tortura dos animais como diversión debe ser suprimida, e a inmensa maioría da poboación nunca asistimos nen asistiremos a unha corrida de touros.

Eliminar as touradas non é unha utopía, como demostran os casos de Catalunya e de Canarias.

Por todo isto demandamos:

1. O cese inmediato de axudas encobertas ás touradas por parte de todas as Institucións Públicas, nomeadamente a Deputación de Pontevedra, principal soporte público na nosa cidade.

2. Que o Parlamento de Galiza modifique a Lei 1/1993 de Protección de Animais Domésticos ou Salvaxes en Cautividade, que exclúe no seu artigo 5º as touradas, para que prohíba estas actividades.

3. O cese de uso de espazos públicos para a promoción das touradas, así como a supresión dos programas das festas editados polo noso Concello.

4 A Declaración de Pontevedra como “Cidade Antitouradas e amiga dos animais”

5. A reconversión da Praza de Touros nun Coliseu para espectáculos culturais e concertos.

—-

> Descarga aquí o cartaz a cor en pequeno / aquí en tamaño grande

> Descarga aquí o cartaz em branco e negro para imprimir en a3

> Descarga aquí o folleto preparado para imprimir en pdf.

> Descarga aquí o colante.

> Descarga aquí o banner publicitario 1

> Descarga aquí o banner publicitario 2.

Éxito da manifestación antitouradas´2010

pontevedraantitaurina — Thu, 05 Aug 2010 00:07:11 +0000

FAI CLICK NA IMAXE PARA VERES O VIDEO

Máis dun milleiro de persoas participaron na mobilización celebrada o pasado sábado en Pontevedra para esixir a abolición das touradas, en coincidencia co inicio da feira taurina, que deixou un saldo de doce touros torturados no seu primeiro fin de semana. Máis un ano, o movemento antitouradas demostra que continúa a avanzar na erradicación desta lacra.

Clique para ver o slideshow.

A marcha partiu pouco despois das 20:00 da Praza da Peregrina, onde rematou unha hora despois, tras percorrer parte do casco histórico e a zona nova da cidade. A Coordinadora Antitaurina de Pontevedra, unha das entidades convocantes, portou varias faixas co significativo lema “Hoxe rexeitamos, mañá aboliremos”. A marcha foi convocada pola Coordenadora Antitouradas e mais pola APDR , ADEGA, BRIGA, C. Ecoloxista do Salnes, CNT , C.S Revira, Galiza Nova, Plataforma Antitouradas de Pontevedra, Nos-Up, Os Chichisos, Protectora “Os Palleiros”, Vaipolorio, Verdegaia. Participaron tamén diversos colectivos ecoloxistas , como Galicia Mellor Sen Touradas ou a protectora de Marín, entre outros.

Ao longo do percorrido, desenvolvido ao longo dunha cidade en festas -nas que as touradas só son seguidas por unha minoría- insistiuse no lema escollido para a faixa de cabeceira (A tortura nin é arte nin cultura) entre outros que pedían a supresión das touradas. Na mente de todos os participantes estaba moi presente a recente prohibición das touradas na Cataluya -agradecida expresamente en diversas consignas e pancartas- por medio da aprobación dunha ILP.

A manifestación rematou coa lectura do manifesto elaborado entre as organizacións convocantes, no que se reclama a modificación da Lei de Protección de Animais Domésticos ou Salvaxes en Cautividade (que expresamente exclúe as touradas do seu ámbito de aplicación) para abolir este espectáculo, o final das axudas públicas ás corridas ou a declaración da cidade como amiga dos animais, entre outras medidas, e anímase á sociedade a continuar as mobilizacións ata acadar estes obxectivos.

Manifestación Histórica contra as touradas en Pontevedra

pontevedraantitaurina — Sun, 02 Aug 2009 18:59:06 +0000

FAI CLICK NA IMAXE PARA VER O VIDEO

Desde a Coordenadora Antitouradas queremos agradecer aos diferentes colectivos participantes, así como ao medio milleiro de persoas que secundaron a nosa mobilización, o seu apoio e compromiso activos coa causa da erradicación das touradas, superando con creces a cifra de asistentes no ano 2008 e conseguindo a maior demostración de oposición ás touradas na historia da cidade. Algúns xornais, como “La Voz de Galicia”, nunha mostra de “profesionalidade” e “veracidade informativa”, reduciron a 40 os participantes, mentres que Xornal de Galicia sí que daba conta da cifra real de asistentes. De todas formas, a todos e todas vós, que facedes posíbel o soño dunha Pontevedra libre do maltrato e sadismo cara os touros: grazas. (a crónica continúa despois da galería de imaxes que podedes ver a continuación)

Minutos antes das 19h da tarde, dúcias de persoas ían chegando á praza da Peregrina para se concentraren e saíren contra as 19:20h en manifestación polas rúas da cidade. Os diferentes colectivos despregaban as súas faixas, a meirande parte delas con motivos alusivos á degradante “festa” dos touros, mentres un gaiteiro amenizaba a mobilización xa desde o comezo. Durante o traxecto puidéronse escoitar diferentes palabras de orde, tal como: “A tortura non é festa nen cultura”, “Ilegalizar o maltrato animal”, “non son artistas, son asasinos” ,”touradas fóra da Galiza” ou “festas populares, sen atrocidades”. A manifestación creou expectación na rúa, e numerosas persoas ían uníndose conforme avanzaba polo centro de Pontevedra. Ao finalizar deuse lectura ao manifesto (que adxuntamos liñas abaixo) e agradeceuse a participación dos colectivos e manifestantes. Na mesma tarde, tres matarifes torturaban os primeiros seis touros dos 24 que serán asasinados nestas dúas fins de semana.

Moitos dos participantes adquiriron antes do comezo os panos verdes editados pola Coordinadora Antitouradas, para subvertirmos así o significado que os pro-touradas conceden ás festas de agosto na cidade, e en particular o fenómeno das “peñas” xuvenís. A marcha percorreu o centro de Pontevedra entre consignas pola abolición da tauromaquia e en defensa dunhas festas populares e sen touradas, para rematar na mesma praza uns tres cuartos de hora despois, onde tres activistas da Coordinadora agradeceron os numerosos apoios recibidos e leron o manifesto, con reivindicacións concretas dirixidas ás institucións.

No entanto, as administracións públicas continúan a colaborar na pervivencia desta barbarie. Á mesma hora que centos de manifestantes ocupaban as rúas, destacados cargos públicos (incluidos o presidente da Xunta Núñez Feijoo, o da Deputación, Rafael Louzán e o ministro de Fomento, José Blanco, así como o Delegado do Goberno, Antón Louro) decidían ratificar publicamente o seu apoio á tortura de animais como divertimento coa súa presenza na praza de touros.

A manifestación demostra que o movimento antitouradas medra ano tras ano, ao consolidarse a oposición social a unha festa baseada no sofrimento dos animais, a pesar do maioritario silenciamento mediático, que chega ata o extremo de non aproveitar o traballo realizado polos seus reporteiros gráficos. Trátase dunha carreira de fondo que só ten un final posíbel: a erradicación desta lacra da nosa cidade. Estamos seguros de que o conseguiremos.

A continuación colamos o manifesto:

MANIFESTO DA COORDENADORA ANTITOURADAS DE PONTEVEDRA

Hoxe en día, mais do que nunca, a sensibilidade perante o maltrato animal debería formar parte do noso ideario colectivo. As touradas representan o paradigma máis cínico deste sofrimento, elevando a nivel de espectáculo a crueldade especista.

Na nosa cidade, nestas dúas fins de semana, serán masacrados vintecatro touros co disfrute dalgúns, a pasividade doutros e o rexeitamento de gran parte da sociedade. As touradas en Galiza contan cunha presenza decadente e unha curta historia, sendo apoiadas por algúns dos sectores mais reaccionarios , e promovidas por empresarios sen escrúpulos, como é o caso dos irmáns Lozano na nosa cidade.

Desde a Coordenadora Antitouradas de Pontevedra recollemos o legado doutros focos de loita antitaurina en Galiza que xurdiran nos últimos tempos, como foi a Plataforma Antitaurina Galega e mais recentemente a iniciativa “Galicia Mellor sen Touradas”, e denunciamos:

- O trato cruel e inhumano que os touros receben no transcurso desta mal chamada festa, na cal o touro é desgarrado, mutilado e torturado até morrer, así como o maltrato animal en xeral.

- A obscena utilización de fondos públicos para o financiamento das touradas (42 euros por habitante, segundo “Libera”), a pesar de que as enquisas (Gallup 07) amosan que o 86% da poboación galega se declara indiferente perante este atavismo.

- As touradas como coartada para a construcción da identidade española en Galiza. Nengunha identidade se pode construír en base ao sofrimento dun animal.

- A forte componente machista das touradas, ao exaltar a figura masculina nunha loita contra un animal mitificado na que o home sae sempre vitorioso.

- O cinismo das Leis españolas e galegas, onde as disposicións legais exclúen taxativamente as touradas do ámbito da súa acción, cando as propias leis están xustificadas por criterios éticos ou morais.

Por tanto, demandamos:

1. O cese inmediato de axudas encobertas ás touradas por parte de todas as Institucións, nomeadamente a Deputación de Pontevedra, principal soporte público na nosa cidade.

2. Que a Xunta de Galiza aprobe unha “Lei de Protección Animal” que proíba as touradas e espectáculos onde se torture ou mate animais.

3. A supresión das touradas como reclamo turístico por parte das Institucións Públicas, así como dos programas de festas editados polo noso Concello, ademais da declaración de Pontevedra como “Cidade Antitouradas e amiga dos Animais”.

4. O uso de espazos públicos para a promoción das touradas.

5. A reconversión da Praza de Touros nun Coliseu para espectáculos culturais e concertos, así como a eliminación de toda a simboloxía taurina presente na cidade.

Desde a nosa Coordenadora solicitamos ás peñas responsabilidade e reflexión perante o uso do maltrato e a barbarie como motivo de celebración.

Por isto, chamamos á cidadanía a amosar publicamente o seu rexeitamento ás touradas e convidamos a participar nas actividades programadas pola Coordenadora, entre as cais queremos convidarvos expresamente ao Encierro antitaurino que terá lugar o mércores 5 ás 8 horas da tarde entre as prazas de San Xosé e a Peregrina. Non esquezades traer as pañoletas antitouradas!

Finalmente , dámosvos as grazas pola vosa participación na mobilización de hoxe. Pasamos a ler a listaxe de apoiantes da convocatoria:

A plataforma “Galicia Mellor sen Touradas“, que aglutina 20 colectivos, a asociación animalista “Matar por Matar Non” , a protectora “Os Palleiros“, a asociación animalista “Libera“, o PACMA (Partido Antitaurino contra o maltrato animal), Verdegaia, a ONG Amarante, Amigos da Terra, Isca! , Assembleia da Mocidade Independentista, Acçom Antifascista, Galiza Nova , a A.C Revira , a LNB (Liga Nacional de Billarda) a A.C. Almuinha de Marín, así como o colectivo de Sarria e Lugo que organizou a manifestación antitouradas en Outarela hai un mes, os voluntarios do Refuxio de Animais Abandonados de Ponteareas – Colectivoanimal (Asociación Protectora Sen Fronteiras), Asociación Protectora Moura, e tamén nos envía o seu apoio o “Colectivo Andaluz contra el maltrato animal”.

Pola fin das touradas da nosa cidade!

Empresarios taurinos ameazan e tentan agredir á membros da Coordinadora Antitouradas de Pontevedra

pontevedraantitaurina — Thu, 30 Jul 2009 17:38:26 +0000

FAI CLICK NA SEGUINTE IMAXE PARA VER O VIDEO

“A tauromaquia é o malfadado e venal arte de torturar e matar animais en público. Traumatiza aos nenos e aos adultos sensibles. Agrava o estado dos neurópatas atraídos por eses espectáculos. Desnaturaliza a relación entre o home e o animal. Constitúe un desafío á moral, a educación, a ciencia, a cultura…”.

Unesco, 1980

Un dos numerosos actos realizados pola Coordinadora Antitouradas de Pontevedra tivo un final inesperado na mañá de hoxe, debido á agresividade dos que enchen os seus petos co sufrimento animal. A plataforma contra estes festexos precintou simbolicamente unha das portas de entrada da praza, co lema “precintado por tortura”, para anticipar unha realidade que agardamos que chegue máis cedo que tarde, e ordenada polas administracións públicas que agora amparan este cruel espectáculo.

No entanto, os empresarios taurinos agardaron a que marcharan os reporteiros gráficos para ameazar e tentar agredir aos integrantes da Coordinadora. Non se limitaron a retirar o precinto da porta entre insultos, senón que un dos presentes chegou a solicitar a outro, en claro ton ameazante, que “le acercase una escopeta”, ademais de proferir insultos orixinais como “cagones”, “portugueses” ou esixir “que habléis en español”.

A continuación, achegáronse violentamente contra os manifestantes e tentaron agredir ao que portaba unha videocámara, que estaba rexistrando o acto. Un dos empregados mesmo portaba un pao co que tentou golpear a un dos manifestantes.

Os empresarios das touradas non querían que ficase constancia documental da súa actitude prepotente e ofensiva, polo que advertiron ao cámara que lle ían “hinchar la cara a hostias”. Anteriormente, os empresarios xa restrinxiran o traballo dos medios de comunicación ao coñecerse as lesións que sofreu un touro cando era transportado cara ao seu lugar de martirio. Afortunadamente, a maior cordura dos contrarios á tortura animal impediu que o incidente pasase a maiores.

A responsabilidade dos irmáns Lozano

Na trifulca chegou a intervir Eduardo Lozano, empresario de Toledo que é o donos da praza a través da sociedade que comparte cos seus irmáns, pero non para calmar os ánimos, senon para tentar expulsar da rúa aos integrantes da Coordinadora.

Os irmáns Lozano adquiriron a praza de touros a finais dos 70, cando só se celebraba unha corrida, para recuperar unha barbarie en declive. Así, lograron aumentar os seus obscenos beneficios, en grande medida grazas ás axudas públicas, a costa da morte de máis touros segundo pasaba o tempo: 12 animais nos 80, 18 nos 90 e os 24 bóvidos asasinados cada verán desde hai algúns anos; unha triste bagaxe de máis de medio milleiro de touros mortos baixo a tortura incesante das banderillas e a espada.

Estes empresarios da tortura son mesmo repudiados no submundo da tauromaquia por numerosas irregularidades legais, débedas acumuladas e uns métodos e actitudes caracterizados pola “prepotencia e abuso de poder” (segundo os propios “matadores”), o que no seu momento levou á xustiza a anularlles a concesión da praza madrileña de Las Ventas.

Non resulta sorprendente en absoluto que quen considera ético lucrarse da tortura dos animais careza tamén de educación e respeto polas persoas. Carentes de empatía cun animal torturado ata a morte, carecen dela para comprender aos seus semellantes que lles reprochan tal atrocidade. En todo caso, non pensamos ceder á coacción e renunciar ás nosas liberdades de expresión, reunión e manifestación, nin temos que tolerar insultos e ameazas como as escoitadas na mañá de hoxe, motivo polo cal nos decidimos a facelos públicas. A pesar do violento intento de censura, a Coordinadora ten imaxes gravadas de todo o incidente –que son accesíbeis no noso web- polo que a súa veracidade está fora de toda dúbida.

Continúan os preparativos da mobilización

A iniciativa en prol da erradicación das touradas prosegue o seu traballo en prol da difusión social da convocatoria de mobilización, o próximo sábado 1 de agosto ás 19 horas na Praza da Peregrina. Ducias de faixas en pontos estrátexicos da cidade, centos de cartaces, e mesas informativas diarias convocan á cidadanía a expresar unha rotunda oposición a esta barbarie que quer disfarzar-se de cultura ou tradición.

Roteiro Antitouradas – A coordenadora reivindica a fin das touradas perante as institucións

pontevedraantitaurina — Wed, 29 Jul 2009 18:33:01 +0000

A Coordinadora contra as Touradas de Pontevedra organizou un roteiro reivindicativo que percorreu as principais institucións públicas que teñen responsabilidades, dun ou doutro xeito, na pervivencia deste espectáculo de tortura animal na nosa cidade. A actividade serve de preludio á manifestación convocada este sábado ás 7 da tarde (desde a Peregrina), na que se agarda a presenza de centos de persoas, fartas desta “tradición” que nada ten a ver nin coa arte nin coa cultura.
A xornada comezou na delegación da Xunta de Galiza en Campolongo, onde se entregou un escrito no que se esixía a promulgación dunha lei de protección animal que inclúa especificamente as touradas entre as práticas prohibidas.

Acompañados en todo momento dunha faixa co lema “Touradas fora de Pontevedra”, a ducia de persoas participantes na iniciativa dirixíronse cara o Concello, onde se reclamou unha declaración de “Cidade Antitouradas” e amiga dos animais, a supresión do evento do programa de festas e a retirada do espazo público da propaganda que incite á matanza de touros.

Faltaban aínda no percorrido a Subdelegación do Goberno e a Deputación de Pontevedra. A ambas institucións reclamámoslles que deixen de subvencionar as touradas ou asociacións que promovan o maltrato animal con fondos públicos.

Por último, achegámonos ata a praza de touros. A Coordinadora reclama a súa reconversión nun coliseu para actos culturais, no momento en que nos libremos desta vergoña, cando as touradas pasen a formar parte dun pasado negro xa superado.

Nestes días, a Coordenadora continúa a pegada masiva de cartaces anunciando a manifestación e segue a instalar en horario de mañá e de tarde a súa mesa informativa na Praza da Peregrina, tendo de momento unha moi boa acollida entre a cidadanía a recollida de sinaturas e visualizando a actividade do noso colectivo. E recordade, o día 1 às 19h na Peregrina, Manifestación Antitouradas en Pontevedra!!

Novas actividades e numerosas adesións á manifestación do día 1 de Agosto

pontevedraantitaurina — Tue, 21 Jul 2009 05:19:37 +0000

Son xa numerosos colectivos e asociacións os que teñen expresado o seu apoio á convocatoria do día 1 de Agosto, como é o caso da plataforma “Galicia Mellor sen Touradas“, que aglutina 20 colectivos, a asociación animalista “Matar por Matar Non” , a protectora “Os Palleiros“, a asociación animalista “Libera“, o PACMA (Partido Antitaurino contra o maltrato animal), Verdegaia, a ONG Amarante, Amigos da Terra, Isca! , Assembleia da Mocidade Independentista, Acçom Antifascista, Galiza Nova , a A.C Revira , LNB (Liga Nacional de Billarda) a A.C. Almuinha de Marín, así como o colectivo de Sarria e Lugo que organizou a manifestación antitouradas en Outarela hai un mes, os voluntarios do Refuxio de Animais Abandonados de Ponteareas – Colectivoanimal (Asociación Protectora Sen Fronteiras), Asociación Protectora Moura, e tamén nos envía o seu apoio o “Colectivo Andaluz contra el maltrato animal”.

Nos próximos días agardamos novas adesións de colectivos ambientalistas e sociais (en permanente actualización)

Para aderir á manifestación, podedes enviar un correo a: adesions@pontevedraantitouradas.org

A Coordenadora Antitouradas de Pontevedra é unha plataforma aberta, plural e integradora a prol da erradicación das touradas na cidade de Ponte Vedra. Logo de 2 anos de traballo contra as touradas baixo o lema “Pontevedra Antitaurina”, durante os cales tiveron lugar diferentes campañas de sensibilización e mobilizacións, a Coordenadora pretende dar un paso adiante e facer visíbel a oposición da maioría dos pontevedreses e pontevedresas ao maltrato animal, con vocación pedagóxica e unitaria.

Así pois, apresentaremos en rolda de imprensa, neste mércores 22 de Xullo, o noso programa de actividades.

CALENDARIO DE ACTOS
- Mércores 22 de Xullo de 2009: Rolda de prensa informativa (ás 12h no salón de actos do edificio dos sindicatos.)

Inicio da campaña de recollida de sinaturas e instalación de mesa na Peregrina. Asemblea da Coordenadora

- Venres 31 de Xullo ás 20h: Charla-Coloquio Antitouradas na praza da Pedreira. Con Rubén Pérez Sueiras (Galicia Mellor sen Touradas) e outra persoa por confirmar.

- Sábado 1 de Agosto de 2009 ás 19h con inicio e fin na Peregrina (Ponte Vedra). MANIFESTACIÓN CONTRA AS TOURADAS POLA RÚAS DA CIDADE

- Mércores 5 de Agosto ás 20h entre a praza de San Xosé e Peregrina: ENCIERRO-ANTITAURINO (performance colectiva)

Para mais información: info@pontevedraantitouradas.org

Agradecemos tamén os apoios expresos que nos fixeron chegar: o blogue A Ponte Vella , o grupo musical INVIVO através de Mario César Vila, Ernesto Vázques Souza.

Notável éxito na mobilizaçom do 9-A e ameaças de sançons económicas

pontevedraantitaurina — Wed, 13 Aug 2008 10:55:48 +0000

Podes ver o vídeo em maio tamanho e qualidade em GzVídeos.

A mobilizaçom de Ponte Vedra Antitaurina congregou centos de pessoas no sábado, mesmo minutos antes da hora agendada, às 7 da tarde, momento no que começavam a torturar um dos 12 animais assassinados na fim da semana na Praça de Touros.

A Peregrina, ateigada por centos de pessoas que viviam as festas da cidade, acolheu umha mobilizaçom histórica, que no entanto repressentou apenas um primeiro passo no caminho de agitamento social, que rematará mais cedo que tarde por expulsar a tortura animal da nossa cidade. As consignas de orde, que se sucederom em todo momento, avogavam pola aboliçom das touradas da cidade e de toda a Galiza e assinalavam responsabilidades assassinas nos matarifes conhecidos como toureiros. A concentraçom partiu da Peregrina e realizou um breve percorrido pola cidade, para rematar na mesma praça, onde se agradeceu a presença de todas as pessoas asistentes e se leu o manifesto da plataforma.

Salientava a presença maioritária da juventude, que na sua imensa maioría rexeita já esta negra “tradiçom” da tristemente chamada “Festa Nacional” polo franquismo. De facto, muitas das pessoas participantes no fenómeno lúdico das penhas –que dum jeito interesseiro se vincula sempre às touradas, quando nom é mais do que umha manifestaçom festiva com predomínio da bebedeira, muito similar a outras no país- optarom por aplaudir a manifestaçom no seu breve percurso pola cidade, primeiro, e depois por unir-se à mesma. Ademais, diversos colectivos e organizaçons ecologistas apoiarom também esta primeira mobilizaçom contra as touradas com a sua presença.

Muitas pessoas asistentes mostravam a sua surpresa ou indignaçom ante a presença policial, nom só polos carros da Polícia Local, se nom dous carros da Polícia “Nacional”, umha carrinha e muitos agentes –que tomavam notas sobre os conteúdos das pancartas, como se fossem delitivas-, incluidos agentes à paisana. Resulta patético e rejeitável que as “forças da orde” amparem e protejam os intereses de empresas privadas, como já se comprovou no último mes, e dediquem os seus esforços a controlar os movimentos populares, quando os motivos da mobilizaçom eram claros, públicos e tam justos como exigir o fim da tortura aos animais.

Ademais, um agente à paisana informou ali mesmo, com atitude chulesca e sem identificar-se, de jeito que parecia um simples mafioso, da intençom do governo espanhol de punir a manifestaçom com 15.000 euros de multa sobre os seus promotores, polo que já vemos que adoptam as sançons depois dumha grande reflexom e ponderando todas as circunstáncias. Para as Administraçons públicas as antitaurinas somos culpáveis (nom se sabe muito bem de que) até que se demostre o contrário, mentres invistem milheiros de euros en financiar e subsidiar as touradas com cartos públicos, já que do contrário nom resistiriam até o dia de hoje.

Da Plataforma amosamos a nossa satisfacçom com o povo de Ponte Vedra, que demostrou na rua o seu rejeitamento a esta barbarie. Mas também sabemos que nom foi se nom um primeiro passo, que a luita nom remata até que dessapareçam as touradas; con todo, aguardamos que as administraçons (nomeadamente o Concelho, em primeiro lugar) tomem boa nota do acontecido e deam passos inmediatos nesta direcçom. A táctica das sançons, escolhida polo governo espanhol para defender a sua negra Festa, poderá supor umha sangria económica para o activismo social, mas também é um fracasso anunciado. De Ponte Vedra Antitaurina pretendemos dar continuidade à mobilizaçom anti-touradas no encerramento da Feria Taurina em vindouros anos, convertendo esta data em referencial no calendário de mobilizaçons animalistas em todo o país. Contamos para isso contigo e, de novo, com os colectivos que nos apoiarom e aos que agradezemos enormemente a súa participaçom.

I Jornadas Antitouradas Galegas

pontevedraantitaurina — Thu, 31 Jul 2008 00:38:16 +0000

Mais info em actividades.

O concello de Pontevedra promociona as touradas para as festas locais

pontevedraantitaurina — Tue, 15 Jul 2008 12:04:33 +0000

Desde a Plataforma Pontevedra Antitaurina queremos denunciar publicamente a promoción que a Cámara Municipal está a facer do masacre taurino cos cartos de todos os contribuíntes. Na apresentación das “Festas do Verán” que fixo o pasado 10 de Xullo apresentouse un programa de festas onde conviven campamentos xuvenís e concertos de Jazz coas touradas, o que nos leva a criticar a colaboración do concello coa empresa responsábel da celebración das touradas dando cobertura publicitaria.

A información da que dipoñíamos até o momento é a de que o Concello interrompera o financiamento e axudas públicas ás touradas respeito a executivos anteriores, que de facto mercaban grandes cantidades de entradas para repartir á cidadanía. O cese de axudas directas supuxera a mobilización de peñas taurinas, que acusaran ao goberno municipal de “boicote” e mesmo seguen a día de hoxe a cuestionar a imposibilidade de colocar barras nas rúas e outras limitacións de horario que non se dan durante a Feira Franca e sí durante “peñas”. Desde entón, é a Deputación Provincial quen dá cobertura institucional ás touradas, de forma directa ou indirecta, como as axudas á coordinadora de peñas taurinas, sufragamento de viaxes, financiamento de chiringuitos e bandas musicais e incluso os coxíns para os asistentes ao masacre taurino. Neste sentido, esiximos que nas próximas convocatorias de axudas da Deputación se inclúa un epígrafe específico para impedir a consecución destas por parte de colectivos que propugnen o maltrato animal. No entanto, o goberno municipal, que se limita a arrendar a praza varias veces por ano para concertos e actos culturais é necesário que tamén interrompa esta vía de colaboración, xa que temos suficientes espazos para a realizacion de concertos e actividades culturais na nosa cidade.

Dunha cámara municipal gobernada varias lexislaturas por unha organización política nacionalista, e incluso con maior presenza que na actual, era de aguardar que se encetasen medidas que tendesen á restrición das touradas ou, cando menos, a atenuar a invasión de propaganda pública deste atavismo españoleiro. Mais non só non se leva a cabo esta limitación, se non que desde o concello se fai propaganda e se inclúe no programa de festas esta salvaxada.

Un dos obxectivos básicos desta plataforma antitaurina, e recollido nas nosas 6 demandas básicas, está o da “supresión das touradas como reclamo turístico por parte das institucións públicas”, así como “a erradicación do uso de espazos públicos para a promoción das touradas”. Na liña das nosas vindicacións, é inadmisíbel que no municipio de Pontevedra:

a) Se permita a colocación masiva de cartaces taurinos de grandes dimensións, con suporte metálico e atados ao mobiliario urbano, o que de facto non só supón unha invasión do espazo público e creación de novas barreiras arquitectónicas, se non que resulta antiestético e , o mais importante, fai promoción dun atavismo execrábel como son as touradas. Aínda pior: denunciamos o dobre raseiro que existe ao impedir en numerosas ocasións que colectivos sociais colen cartaces pola cidade, con identificacións policiais incluídas, mentres se lexitima e se permite a propaganda taurina.

b) Se apresente publicamente un programa de festas que faga proselitismo dunha actividade privada realizada pola empresa “Plazas y Toros S.L”, aínda por riba consistente no maltrato sádico e posterior execución de 24 touros durante 4 días que durarán as touradas. Ademáis, colócanse pola cidade adiante monolitos publicitarios das festas cunha destacada presenza da “Feria Taurina” (iso sí, en perfeito galego normativo, vaia contradición), normalizando e naturalizando a sú celebración.

c) Non se teñen iniciado medidas tendentes á erradicación das touradas da nosa cidade, que transmiten unha pésima imaxe e contribúen ao desprestixio de Pontevedra, única cidade galega recoñecida por ter unha praza de touros estábel. A cobertura institucional permite a continuidade e lexitimación da barbárie taurina.

Para rematar, gostaríanos remarcar a evidente contradición na que cae, ano tras ano, o goberno municipal da nosa cidade. Mentres remarca o seu suposto perfil ambientalista e se afana por sacar a Ence da Ría, recuperar as beiras do Lérez e o río Gafos e se preocupa pola situación do marisqueo, non teña en conta que no centro da cidade se matratan e asasinan impudicamente 24 touros nas Festas da cidade nun lamentábel espectáculo onde o sadismo e a exaltación masiva do derramamento de sangue e da tortura taurina son os protagonistas.

Así mesmo , reclamamos as pertinentes explicacións por conter os cartaces taurinos a expresión “patrocina Exmo. Ayuntamiento”, pois descoñecemos se é algo recorrente e se limita á simples autorización de festexos e presenza no programa de festas ou podería incluír algunha vía de complicidade económica, en cuxo caso esiximos desde xa a súa paralización imediata.

Aínda é tempo de rectificar e camiñar cara á designación por parte do concello da nosa cidade como “Amiga dos Animais” e polo tanto antitaurina, como xa fixeran mais de 60 concellos en Catalunya e Canarias. A responsabilidade das institucións na pervivencia das touradas é evidente, e seguirémolo denunciando publicamente até que non se interrompa.

A recollida de firmas que encetaba a plataforma o pasado sábado xa contén varios centos no pouco tempo que polo de agora permaneceu a mesa na Praza da Peregrina. É de presumir que moitos mais pontevedreses se vaian unindo á vindicación anti-taurina, pois xa estamos cansos de ano tras ano aguantar a exaltación do maltrato animal sen que as institucións non só non impidan a súa celebración, se non que se encirren en facerlles propaganda e financialas.

Non se pode aducir que haxa unanimidade na cidade no tocante ás touradas. A Plataforma sabe que miles de pontevedreses arrenegan do asasinato impúdico e con fin lúdico de touros e estamos seguros de que nun futuro próximo, e coa colaboración de todos, será posíbel a súa erradicación.

Chamamos pois, á mobilización para o día 9 de Agosto ás 19 horas na praza da Peregrina e a asinar na nosa folla vindicativa. Iniciamos un camiño que remata inexorábelmente coa fin das “touradas á española” na nosa cidade e non desistiremos até logralo.

STOP TOURADAS. PONTEVEDRA ANTITAURINA.

Pontevedra, 15 de Xullo do 2008.

O debate sobre as touradas chega á prensa

pontevedraantitaurina — Mon, 20 Aug 2007 16:10:09 +0000

E non sen polémica nen sen ameazas de accións xudiciais de por medio. Pero vaiamos por partes.

Primeiro foi un artigo nada belixerante e bastante correcto en canto á actividade de Pontevedra Antitaurina no “Galicia Hoxe”, onde se fixeron eco dos nosos principios:

“a plataforma preparou tamén un decálogo no que refutan, de xeito razoado pero contundente, os principais argumentos a prol da celebración taurina. “Deixa cartos, e tamén o tráfico de armas. É unha tradición, pero tamén o eran a escravitude ou os sacrificios humanos. Son un espectáculo, pero un que transmite e xustifica valores negativos, como o uso da violencia e o goce coa tortura”.

Logo, Manoel Santos, biólogo e columnista habitual de “Altermundo” e “Galicia Hoxe”, adicou palabras de apoio a Pontevedra Antitaurina no propio xornal, amosándose duro cos defensores do martirio de touros:

“[...]a cousa ten un cheiriño algo fascista. E fascista debe ser cando a protesta pacífica dos activistas foi respostada primeiro co acoso policial -ninguén máis pega carteis en Pontevedra?- e despois cunha violenta acción, literalmente incendiaria, o día 11 contra o Centro Social A Revira, que entre outras cousas sérvelle de ágora aos antitaurinos do Lérez. Non é pois de estrañar que estes se sentan acosados, e sinalan polo miúdo -no referente ao asedio verbal- a un grupo de amantes dos matadores, a Peña 11. Un dos seus membros ten un blog (cesarabal.blogspot.com) moi clarificador. Tolerante el, deféndese das accións pacíficas dos antitaurinos con incongruencias como: “La Peña11 es una peña plural y libre que respeta todas las opiniones”. Non así todas as vidas, diría eu. Porén, do atentado non di ren. Supoño que o do día 11 e a Peña 11 é casual, que eu na cabalística créovos pouco.”

A editora de Galicia Hoxe, “El Correo Gallego”, non debeu quedar coa conciencia demasiado tranquila cando pasou claramente á ofensiva adicando nada menos que dous artigos ao tema. No primeiro deles ocúpanse de recordar o “glorioso pasado taurino de Pontevedra“, onde de paso trata aos taurinos pontevedreses como “aficción no demasiado entendida” e lembra algunha anécdota que intenta vestir de “glamour” a apoloxía do maltrato animal (algo bastante común nos media):

” Una de las corridas que más historia hizo en Pontevedra y que atrajo a más público extranjero fue la protagonizada el 11 de agosto de 1957 por Luis Miguel Dominguín, Antoñete y Solanito, que torearon morlacos portugueses de Palha. Se colgó el cartel insólito de “no hay billetes” (como ocurrió el pasado día 4), y a la fiesta asistieron famosos de Hollywood y de las mayores riquezas de la Marbella de entonces”

E noutro artigo, publicado no mesmo xornal español:

“Galicia siempre ha sido taurina.Pontevedra es nuestro coso emblemático. Uno ha visto ahí alguna de las mejores faenas de una vida entera. Tiene un ambiente consolidado, producto de un buen hacer centenario. Y eso, queridos amigos, se nota.”

A estratexia do Grupo Correo linda coa traxicomedia, mentres que o melodrama queda reservado para os cachorros taurinos do Partido Popular, que ameazan con accións legais a Manoel Santos simplesmente por saír a defender á Plataforma do acoso mediático, policial e mafioso do que foi obxecto. Primeiro foi a apoloxía e defensa do maltrato animal, agora a infamia chega até o ponto de censurar a liberdade de expresión.

Desde aquí queremos agradecerlle a Manoel Santos as súas palabras de alento, e ofrecerlle o noso apoio fronte aos que non aturan as voces discordantes. Foron os “amos da cidade” durante tanto tempo que se cren co dereito de impor aos demais as súas atávicas tradicións.

Pero xa haberá tempo para repasar a historia das touradas na Galiza e a exaltación españolista que representan desde a súa introdución, por parte de elites foráneas. A pretensión de facelas pasar por galegas denota, de paso, a concepción que teñen do noso país e do tipo de “cultura” que pretenden alentar.

Polo de agora, o debate foi encetado na prensa. Hai que levalo ás rúas e convencer á cidadanía que o maltrato e desangramento dun touro, por moitos ingresos que poida xerar, non pode ser tolerado en pleno século XXI. Mais haberá quen se empeñe en convencernos do contrario.